ಕಳವು

ಕದ್ದೆಯಲ್ಲೇ ಹೃದಯವ ನನಗರಿಯದೇನೆ..
ದೂರ ನೀಡುವೆನು ನಾ ಈ ಕಳವಿಗೆ..
ಏನೀ ಮಾಯೆಯೋ.. ಜಾಲವೋ...
ಯಾಕೋ ಹಿತವಾದ ಯಾತನೆ..

ಪ್ರೇಮದ ಹಂಬಲಿಕೆಯಲ್ಲಿರೋ ಹೃದಯವದು
ಮೋಸದ ಗಂಧವಿಲ್ಲದ ಮುಗ್ದ ಪ್ರಾಮಾಣಿಕ..
ನಿಮಿಷದ ಹಿಂದೆ ಧರೆಗಿಳಿದ ಎಳೆ ಶಿಶುವಿನಂತೆ.

ನಿಸ್ವಾರ್ಥಿ ಆದರೂ ನಿನ್ನ ಮೋಹಿತ..
ತಪ್ಪಲ್ಲ ಬಿಡು ನಿನ್ನ ಸೆಳೆತ
ಶಿಶುವಿಗೆ ಚಂದಿರನ ಮೋಹದಂತೆ..

ನನಗಿಂತ ನಿನ್ನನೇ ಜಪಿಸುತಿಹುದು ನಿನ್ನ ಮೋಡಿಗೆ ಸಿಲುಕಿ
ಪರವ್ಯಾಮೋಹಿ ಹೃದಯ, ಮರಳಿ ಬೇಕಿಲ್ಲವದು ನನಗೆ
ಹರಿಯಗೊಡು ನಿನ್ ಹೃದಯವ ನನ್ನೆಡೆಗೆ..