ಒಲವ ಅಮಲಿನಲಿ...

ಏನಾಗಿದೆ ಇಂದು ನನಗೇನಾಗಿದೆ ಇಂದು 

ಏನೋ ನಾನರಿಯೆ ಯಾಕೋ ನಾ ತಿಳಿಯೆ

ಬಾನ ಮುಗಿಲಲ್ಲಿ ತೇಲಂಗಾಯ್ತಲ್ಲೇ...

ನಿನ್ನ ಆ ಕಣ್ಣೋಳಪು  ಮೊಗದ ಆ ಸಿಹಿಗಂಪು

ಸೇರಿ ಅದು ಯಾಕೋ ಅಮಲೇರಿತಲ್ಲೇ 

ನಿನ್ನ ಹೃದಯದ ಮಿಡಿತ ನನ್ನ ಹೃದಯವ ಮೀಟಿ

ನನಗರಿಯದೇ ಒಲವ ದೀಪ ಹಚ್ಚಿತಲ್ಲೇ...

ಈ ಚುಮು ಚುಮು ಚಳಿಯಲ್ಲಿ ನಿನ್ನ ಬೆಚ್ಚನೆ ಕೈ ಸ್ಪರ್ಶ

ಎದೆಯಾಳದ ತುಂಬಾ ಬಿಸಿ ಭಾವ ತಂದಿತಲ್ಲೇ

ಅದು ಯಾಕೋ ಅದು ಯಾಕೋ ನಿನ್ನ ತುಟಿಯ ಸಿಹಿಜೇನು

ನನ್ನ ತುಟಿಗೆ ತಾಗಿ ನಾ ಮೈ ಮರೆಯೊಂಗಾಯ್ತಲ್ಲೇ... 

ನೆನಪಾಗದಿರು ಓ ನೆನಪೇ...

ನೀ ಒಂದು ಮುಗಿಯದ ಅಧ್ಯಾಯ

ನನ್ನ  ನೆನಪಿನ ಪುಟಗಳಲಿ 

ತಿರುವಿ ತಿರುವಿ ಹಾಕಿದರೂ ಮತ್ತದೇ ತಿರುವಿನ ನೆನಪು

ಮರೆವೆನೆಂದರೂ ಮರೆಯಲಾಗದೆ ತಿರು ತಿರುಗೋ ನೆನಪು

ಹೇಗೆ ಮರೆಯಲಿ ನಾ ಮರೆಯದ ನೆನಪ...

ನೆನಪಿದು ಕೊಲ್ಲುತಿಹುದು, ಅಳಿಸುತಿಹುದು

ಇದು ಕೊಲೆಪಾತಕ ಉಗ್ರ ನೆನಪು

ಮರೆವೆನೆಂದರೂ ಮರೆಯಲಾಗದೆ

ಕಾಡಿಸುವ ಕಹಿ ನೆನಪು..

ನೆನಪಾಗದಿರು ಓ ನೆನಪೇ

ಬೇಡ ಎನಗೆ ಸಂಕಟದ ನೆನಪು 

ಸುಂಕ ನೀಡುವೆ ನಿನಗೆ ಮತ್ತೆ ಬರದಿರು ನೆನಪೇ

ನೆನಪಿನ ಪುಟಗಳಲಿ ಮತ್ತೆ ನೆನಪಾಗಿ..

ನೀ ಒಂದು ಮುಗಿಯದ ಅಧ್ಯಾಯ

ನನ್ನ  ನೆನಪಿನ ಪುಟಗಳಲಿ ...